વેલકમ ટુ ધ વર્લ્ડ ઓફ ગુચ્ચમ

છેલ્લાં કેટલાંક સમયથી ગુચ્ચમ શબ્દ મારી બોલચાલનો એક ભાગ થઈ ગયો છે. સામાન્ય વાતચીતમાં પણ ક્યાંકને ક્યાંક તેનો પ્રયોગ અનાયસે જ થઈ જાય છે. શરૂઆતમાં મિત્રો સાથેની વાતચીત દરમિયાન કાને પડેલો આ શબ્દ સાંભળવામાં મજા આવી અને ક્યારે તે મારી રોજિંદી બોલચાલનો ભાગ થઈ ગયો તેનો ખ્યાલ જ ના રહ્યો. ઘણાં દિવસો સુધી વાતવાતમાં આ શબ્દનો ઉપયોગ કર્યા પછી એકાએક જ તેના વિશે વિચારતા તેની વ્યાપકતા વિશે આંશિક ખ્યાલ આવ્યો.
ગુચ્ચમ. ગુજરાતમાં મકરસક્રાંતિ કે ઉત્તરાયણના દિવસે પતંગ ચગાવવાનું ખુબ જ મહત્વ છે. પતંગ ચગાવતી વખતે ઘણીવાર દોરી અથવા માંજો એક જ જગ્યાએ ભેગો થઈ જવાને લીધે તેમાં સરળતાથી ના ઉકેલી શકાય તેવા વળ પડી જાય છે. જેને સામાન્ય બોલચાલની ભાષામાં ગૂંચ કે ગુચ્ચમ કહે છે. ગૂંચ શબ્દ ગૂંચવણ પરથી ટૂંકાઈને બનેલો છે. જેનો અર્થ :
ગૂંચવવું કે ગૂંચવાવું, આંટીઘૂંટી અથવા તો જેમાંથી ઉકેલ કાઢવો મુશ્કેલ થઈ પડે તેવી પરિસ્થિતિ એવો થાય છે.
આજના ભાગદોડભર્યા જીવનમાં દરેક જણ નાની મોટી ગુચ્ચમમાં ફસાયેલો હોય છે. દરેક વ્યક્તિની પોતાની ગુચ્ચમ હોય છે અને તેના જુદાં-જુદાં કારણો હોય છે. એટલું જ નહીં પણ દરેકને બીજાન સરખામણીએ પોતાની ગુચ્ચમ વધુ જટિલ અને ઉકેલી ના શકાય તેવી લાગતી હોય છે. દરેક પોતાની રીતે તેનો ઉકેલ લાવવા પ્રયત્નશીલ રહે છે. આજે એક ગુચ્ચમ ઉકેલી તો વળી કાલે બીજી કોઈ ગુચ્ચમ આવી જાય છે. વળી એવું પણ બને કે અગાઉની ગુચ્ચમ કરતાં નવી ગુચ્ચમ વધુ જટિલ હોય, અથવા તો વધુ સરળ હોય. આમ રોજે રોજ પેદા થતી ગુચ્ચમો અને તેના ઉકેલો શોધી આગળ વધવાનું નામ જ જીવન છે.